កម្ពុជាប្រារព្ធខួបលើកទី៩ នៃការដាក់បញ្ចូល «តំបន់ប្រាសាទសំបូរព្រៃគុក» ទៅក្នុងបញ្ជីបេតិកភណ្ឌពិភពលោក

ភ្នំពេញ៖ ថ្ងៃទី០៨ ខែកក្កដា ឆ្នាំ២០២៦ នេះ គឺជាខួបលើកទី៩ នៃការដាក់បញ្ចូល «តំបន់ប្រាសាទសំបូរព្រៃគុក» ទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ (UNESCO) (០៨ កក្កដា ២០១៧ - ០៨ កក្កដា ២០២៦)។ ព្រឹត្តិការណ៍ជាប្រវត្តិសាស្ត្រនេះ នាំមកនូវមោទនភាពជាតិដ៏ខ្ពង់ខ្ពស់ និងជាការឆ្លុះបញ្ចាំងពីតម្លៃមិនអាចកាត់ថ្លៃបាននៃសម្បត្តិវប្បធម៌ និងដូនតាខ្មែរលើឆាកអន្តរជាតិ។

រមណីយដ្ឋានប្រាសាទសំបូរព្រៃគុក មានទីតាំងស្ថិតនៅក្នុងខេត្តកំពង់ធំ ដែលជាអតីតរាជធានី «ឥសានបុរៈ» នាសម័យចេនឡា ក្នុងចុងសតវត្សរ៍ទី៦ និងដើមសតវត្សរ៍ទី៧។ តំបន់បេតិកភណ្ឌនេះ មានភាពល្បីល្បាញដោយសាររចនាបថស្ថាបត្យកម្មឥដ្ឋប្លែកៗ ពិសេសគឺប្រាសាទប្រាំបីជ្រុង និងចម្លាក់លម្អលើជញ្ជាំងឥដ្ឋយ៉ាងផ្ចិតផ្ចង់។

ការរក្សាបាននូវឋានៈជាបេតិកភណ្ឌពិភពលោកក្នុងរយៈពេល ៩ឆ្នាំកន្លងមកនេះ គឺកើតចេញពីកិច្ចខិតខំប្រឹងប្រែងរួមគ្នារវាងរាជរដ្ឋាភិបាលកម្ពុជា ក្រសួងវប្បធម៌ និងវិចិត្រសិល្បៈ អាជ្ញាធរជាតិសំបូរព្រៃគុក ព្រមទាំងដៃគូអន្តរជាតិ ក្នុងការអភិរក្ស ជួសជុល និងការពារតំបន់ប្រវត្តិសាស្ត្រនេះ ប្រកបដោយចីរភាព។

ក្នុងឱកាសដ៏វិសេសវិសាលនេះ សារព័ត៌មានយើងខ្ញុំ សូមអំពាវនាវដល់បងប្អូនប្រជាពលរដ្ឋខ្មែរគ្រប់រូប ជាពិសេសស្រទាប់យុវជន ចូលរួមស្វែងយល់ ថែរក្សា និងការពារមរតកវប្បធម៌ដូនតាឱ្យបានគង់វង្សយូរអង្វែងតទៅដរាបរៀងជ័យ៕