ឯកឧត្តម នេត្រ ភក្ត្រា ចុះពិនិត្យស្ថានភាពទឹកជំនន់ទន្លេមេគង្គ និងសួរសុខទុក្ខប្រជាពលរដ្ឋរងគ្រោះក្នុងស្រុកឆ្លូង ខេត្តក្រចេះ

ខេត្តក្រចេះ៖ ថ្នាក់ដឹកនាំ ឯកឧត្តម នេត្រ ភក្ត្រា បានអញ្ជើញចុះពិនិត្យស្ថានភាពទឹកជំនន់ និងសួរសុខទុក្ខប្រជាពលរដ្ឋដោយផ្ទាល់ នៅតាមដងទន្លេមេគង្គ ក្នុងឃុំព្រែកសាម៉ាន់ និងឃុំកញ្ជរ ស្រុកឆ្លូង ខេត្តក្រចេះ។

យោងតាមរបាយការណ៍របស់លោកស្រី គង់ លឹមហូ អភិបាលស្រុកឆ្លូង គិតត្រឹមថ្ងៃទី២៤ ខែសីហា ឆ្នាំ២០២៦ កម្ពស់ទឹកទន្លេមេគង្គបានកើនឡើងដល់ ២១.៧៣ ម៉ែត្រ បណ្តាលឱ្យឃុំចំនួន ៧ (ស្មើនឹង ៣១ ភូមិ) រងផលប៉ះពាល់លើផ្នែកសង្គម កសិកម្ម និងហេដ្ឋារចនាសម្ព័ន្ធ។

ទិន្នន័យផលប៉ះពាល់សរុបក្នុងស្រុកឆ្លូង៖

• ប្រជាពលរដ្ឋ និងលំនៅឋាន៖ ប៉ះពាល់ប្រជាពលរដ្ឋ ១,៨៣៣ គ្រួសារ (ស្មើនឹង ៨,០១១ នាក់), ប៉ះពាល់ខ្នងផ្ទះ ១,៤៦១ ខ្នង និងបង្គន់អនាម័យ ១,០៣១ បង្គន់។

• វិស័យសង្គម និងកសិកម្ម៖ ប៉ះពាល់ផ្ទៃដីស្រូវ ៣៦១ ហិកតា (៣២៦ គ្រួសារ), ដំណាំរួមផ្សំ ៤៥ ហិកតា (៤៤ គ្រួសារ), សាលារៀន ៨ កន្លែង, សាលាឃុំ ២ កន្លែង, និងវិហារសាសនា ៤ កន្លែង។

• ហេដ្ឋារចនាសម្ព័ន្ធ៖ ខូចខាតផ្លូវសរុប ៤៣ ខ្សែ ប្រវែង ៧៤,៣៧១ ម៉ែត្រ (ផ្លូវគ្រួស ៤០ ខ្សែ និងផ្លូវបេតុង ៣ ខ្សែ ប្រវែង ៦៥០ ម៉ែត្រ), ស្ពាន ២ កន្លែង (ក្នុងឃុំព្រែកសាម៉ាន់), លូកាត់ផ្លូវ ៤០ កន្លែង, ទំនប់ ២៨ កន្លែង, និងទ្វារទឹក ៧៣ កន្លែង។ ព្រមទាំងបាក់ច្រាំងទន្លេចូលមកផ្លូវប្រវែង ៨៧៣ ម៉ែត្រ (ក្នុងឃុំហាន់ជ័យ និងឃុំកញ្ជរ)។

ស្ថានភាពប្រឈមខ្លាំងនៅឃុំព្រែកសាម៉ាន់៖ ប្រជាពលរដ្ឋរស់នៅតាមច្រាំងទន្លេក្នុងឃុំព្រែកសាម៉ាន់ រងហានិភ័យខ្ពស់ជាងគេ ជាពិសេសក្នុងភូមិឈើទាលភ្លោះ (ប៉ះពាល់ ២១៤ ខ្នង ផ្ទះជាប់ច្រាំងទន្លេ ៥៣ ខ្នង និងបានជម្លៀស ៦ គ្រួសារ) និងភូមិព្រែកសណ្តាយ (ប៉ះពាល់ទាំងស្រុង ៤៥២ ខ្នង ផ្ទះជាប់ច្រាំងទន្លេ ៧៩ ខ្នង និងបានជម្លៀស ៦៥ គ្រួសារ ទៅទីទួលសុវត្ថិភាព)។