ក្លិបអ្នកកាសែតកម្ពុជា (ក.អ.ក) សហការជាមួយក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា បានរៀបចំវេទិកាពិភាក្សាសារព័ត៌មានលើប្រធានបទ «ការប្រើភាសាខ្មែរឱ្យបានត្រឹមត្រូវ៖ នរណាជាអ្នកទទួលខុសត្រូវ» នៅរាជបណ្ឌិត្យសភាកម្ពុជា

ភ្នំពេញ៖ នាថ្ងៃទី៣១ ខែសីហា ឆ្នាំ២០២៦ នេះ ក្លិបអ្នកកាសែតកម្ពុជា (ក.អ.ក) សហការជាមួយក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា បានរៀបចំវេទិកាពិភាក្សាសារព័ត៌មានលើប្រធានបទ «ការប្រើភាសាខ្មែរឱ្យបានត្រឹមត្រូវ៖ នរណាជាអ្នកទទួលខុសត្រូវ» នៅរាជបណ្ឌិត្យសភាកម្ពុជា ដោយមានការចូលរួមពីអ្នកសារព័ត៌មាន អ្នកផលិតមាតិកា និងតំណាងស្ថាប័នពាក់ព័ន្ធសរុបចំនួន ១២០ នាក់ មកពី ៨២ ស្ថាប័ន។

វេទិកានេះត្រូវបានរៀបចំឡើងក្នុងគោលបំណងលើកកម្ពស់ការប្រើប្រាស់ភាសាខ្មែរឱ្យបានត្រឹមត្រូវ ក្នុងបរិបទដែលប្រព័ន្ធផ្សព្វផ្សាយ និងបណ្តាញសង្គមកំពុងដើរតួនាទីយ៉ាងសំខាន់ក្នុងការផ្សព្វផ្សាយ និងមានឥទ្ធិពលខ្លាំងលើការប្រើប្រាស់ភាសារបស់មហាជន។

ពិធីនេះទទួលបានការអញ្ជើញចូលរួមជាវាគ្មិនកិត្តិយសពី៖

   -លោកបណ្ឌិតសភាចារ្យ ហ៊ាន សុខុម ប្រធានក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា

   -លោកបណ្ឌិត មាឃ បូរ៉ា ប្រធានវិទ្យាស្ថានជាតិភាសាខ្មែរ នៃរាជបណ្ឌិត្យសភាកម្ពុជា

   -លោក ជិន លន សាស្ត្រាចារ្យនៃពុទ្ធិកវិទ្យាល័យព្រះសុរាម្រឹត

   -លោក ពុយ គា ប្រធានក្លិបអ្នកកាសែតកម្ពុជា (ក.អ.ក)

នៅក្នុងឱកាសនោះ វាគ្មិនជំនាញបានធ្វើបទបង្ហាញ និងចែករំលែកពីតួនាទីយ៉ាងសំខាន់របស់ប្រព័ន្ធផ្សព្វផ្សាយ ព្រមទាំងផលប៉ះពាល់អវិជ្ជមានដែលកើតចេញពីការប្រើប្រាស់ភាសាខ្មែរមិនបានត្រឹមត្រូវ ទាំងផ្នែកអក្ខរាវិរុទ្ធ ពាក្យពេចន៍ និងវេយ្យាករណ៍ ឬការប្រើប្រាស់ប្រាសចាកពីនិយាមអក្សរសាស្ត្រខ្មែរ។