រដ្ឋបាលខេត្តកំពង់ចាម សហការជាមួយ គ.ជ.ប បើកវគ្គបណ្តុះបណ្តាលស្តីពីការងារចុះឈ្មោះបោះឆ្នោត ឆ្នាំ២០២៦

កំពង់ចាម៖ នៅព្រឹកថ្ងៃទី៦ ខែវិច្ឆិកា ឆ្នាំ២០២៦ រដ្ឋបាលខេត្តកំពង់ចាម សហការជាមួយគណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំបើកវគ្គបណ្តុះបណ្តាល ស្តីពី «ការដាក់ ការទទួល និងការដោះស្រាយពាក្យបណ្តឹង ព្រមទាំងការស្រង់ស្ថិតិប្រជាពលរដ្ឋប៉ាន់ស្មាន សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៦» ជូនដល់អភិបាលក្រុង-ស្រុក មេឃុំ និងចៅសង្កាត់ ក្នុងខេត្តកំពង់ចាម។

ពិធីនេះប្រព្រឹត្តទៅក្រោមអធិបតីភាព ឯកឧត្តម ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត តំណាងដ៏ខ្ពង់ខ្ពស់ ឯកឧត្តម ប្រាជ្ញ ចន្ទ ប្រធាន គ.ជ.ប និង ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នៅសាលាខេត្តកំពង់ចាម ដោយមានសិក្ខាកាមចូលរួមប្រមាណ ២០០នាក់។

មានប្រសាសន៍សំណេះសំណាលក្នុងឱកាសនោះ ឯកឧត្តម អ៊ុន ចាន់ដា បានសម្តែងនូវសេចក្តីរំពឹងទុកថា តាមរយៈវគ្គបណ្តុះបណ្តាលពេញមួយថ្ងៃនេះ សិក្ខាកាមទាំងអស់នឹងទទួលបានចំណេះដឹង និងបទពិសោធន៍ថ្មីៗបន្ថែមទៀត តាមរយៈការធ្វើបទបង្ហាញ ការបកស្រាយ និងការពន្យល់យ៉ាងលម្អិតពីសំណាក់គ្រូឧទ្ទេស ដើម្បីយកទៅអនុវត្តការងារឱ្យមានប្រសិទ្ធភាព គុណភាព និងនិរន្តរភាព។

ជាមួយគ្នានេះ ឯកឧត្តម ទេព នីថា ក៏បានគូសបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ គឺជាការងារដ៏សំខាន់មួយក្នុងដំណើរការរៀបចំការបោះឆ្នោត។ ដូច្នេះ មន្ត្រីពាក់ព័ន្ធគ្រប់លំដាប់ថ្នាក់ ត្រូវមានចំណេះដឹងច្បាស់លាស់ ជំនាញវិជ្ជាជីវៈ ការទទួលខុសត្រូវខ្ពស់ និងសមត្ថភាពគ្រប់គ្រាន់ក្នុងការអនុវត្តការងារឱ្យបានត្រឹមត្រូវ ស្របតាមច្បាប់ បទបញ្ជា នីតិវិធី និងលិខិតបទដ្ឋានគតិយុត្តជាធរមាន។